إمتحان الثانوية

موضوع: إمتحان الثانوية الخميس مايو 15, 2008 6:44 pm

ده إتبعت لكاتب وهوة نشرو وحطه ع المواقع برضه

وصلتني رسالة على الإيميل من صديق تحمل عنوان "أنفراد.. أمتحان اللغة العربية للثانوية العامة".. بيني وبينكم اتخضيت وقررت اني مفتحهاش علشان متضايقش أكتر.. وبعد ثواني ومن غير سبب.. الفضول خلاني افتحها.. أية رأيكم نقرأها سوا.. وبعدها كل واحد يكتب تعليقه.. يلا بينا

السؤال الأول: التعبير

اكتب ما لايقل عن 650 سطر فى أحد الموضوعات التالية

لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب

ــــــــــــــــــــــــــــــــــــــــــــــــــ ـــــــ
السؤال الثانى: القصة

من قصة ' وعهد الله ما انت داخل الانتخابات' .. اقرأ القطعة وأجب عن الآتى:

(ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟)

الأسئلة:

1-ما هى اللحمة؟ أو على الأقل حدد أقرب معنى خيالى لها

2-مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت

3-لماذ ضربه الرجل بالجزمة وليس بالعصى مثلا؟؟
(أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة بس مش فى الضرب.. افهم انت بقى) اختر

4-حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا

ــــــــــــــــــــــــــــــــــــــــــــــــــ ــــــــــــ
السؤال الثالث النصوص

أجب عن أحد النصين الآتيين

من نص ( ماشربتش من نيلها)..اقرأ ثم أجب

(ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها)

1-بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟

(المسيسبى - الأمازون – يونج يانج)

2-هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه

3-أكمل الأبيات إلى آخر كحكة فى الكليب

4-قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى

ــــــــــــــــــــــــــــــــــــــــــــــ
السؤال الرابع الخط

كوز المحبة انخرم..طرطش على كمى..ياحبيبى بطل جفا وارحم عذاب امى

اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء

شكرا نور
كان الله فى عون الممتحنين

ميرسى ياأحمد
ومستنية ردود الباقينن ورأيهم فى الامتحان

جامده يانور بس فيه اسئلة معرغتش اجاوب عليها

الحمد لله انى خلصت ثانوية عامة قبل المنهاهج ما تتصعب

بس كده اللى هيدخلوا طب مش ولاد الدكاتره اكيد هيبقوا ولاد الحزب الوطنى

على فكرة انا واحد منهم

هههههههههههههههههه
جاااااااااامدة يا نور
شكرااااااااا يا جميل

ميرسى ياميدو مع إنه فى مستوى الطلب العادى والمتوسط مش هما ع طول بيقولولنا كدة
ميرسى ياتوتا

التوبيك جامد جدا يا نور

سلمت يداك

ميرسى ياااا خلاص خليها حمادة بقى كفايا ميدوهات فى المنتدى
ميرسى ياحمادة جدا لمرورك

» غرفة بنت فى الثانوية العامة
» جدول امتحان الثانوية العامة المرحلة الاولى والثانية