قلبي لقاك
::::::::::::::::::::::::::::::::::
قلبي لقاك!
يافرحته
قلبي اللي كان_من غربته
بيلضم خيوط قصيرة
في ابره صدت من زمان
_ويادوب يخيط غرزتين
تشبك قماشته فإبرته
_ازاي يطرز توب زفاف
رغم هشاشة ابرته
يافرحتي و يافرحته
قلبي لقاك !
يادهشته!
فعلا حكاية مشقلبة
فارس الأحلام كسب
سبق الزمن
من غير فرس
وقف الزمن
يمدح رشاقته وخفته
وانا في عز فرحتي
يافرحتي ويافرحته
قلبي لقاك
يالهفته
نفسه يتوج فرحته
لما يحني ايد الفرح
بلون شفايف ضحكته
ملهوف على مدد العيون
بيطير بدون
لاجناح ورق
ولابساط.. تأليف واخراج حضرته
وده مش خيال
يافرحتي ويافرحته
قلبي لقاك
يانصرته
من بين قلوب العطشانين
اخترت تملا قلته
شباكنا هلت نسمته
قبل ماتوصل ناحيته
وشيشنا زغرط مال هنا
يافرحتي ويافرحته
قلبي لقاك
ياوقعته
في بير عسلنا وقشطتك
هيدوب كمان
وترقصه على طبلتك
مش قلتلك؟
ياوقعته وياوقعتك
يافرحته ويافرحتك
الأربعاء أبريل 23, 2008 2:36 am
