عشان انت مصرى

اخر اهداء من الفنان احمد فؤاد نجم الى المصريين

قصيدة عشان انت مصرى



عشان انت مصرى... لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الأغانى
بتاع الحضارة وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدأ فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش مية تشطف صابونة فى إيديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصلة
أدى المترو واقف وكهربته فاصلة
وفى الميكروباص خناقة وحاصلة
أوتوبيس فرامله عايزالها وصلة
وتوك توك ده تايه ومحتاج لبوصلة

بتوصل لشغلك بدم اتحرق
فى زحمة وكتمة وحر وعرق
رئيسك سايبلك كومة ورق
ده غير دمغة ضايعة وملف اتسرق
وفيه كام مواطن عامللك قلق
بيشكى تقول له روح اندعق
وعركة وهوجة وشاى اندلق
ومخك خلاص م الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تِهاتى ياناس اتهريت
ولا حد سامعك مهما هاتيت
عشان انت مصرى وده للاسف
فلازم تقاسى تعيش تتقرف
وكل الأساسى فى حياتك ترف
فتنسى الكرامة وتنسى الشرف
وتسرق وتنصب أو تنحرَف
ودمعك بيجرى وجرحك نزف
مش انت اللى مصرى؟؟؟ جتك ميت قرف

جميلة يانورسين تسلمى يا قمر

انا قرتها قبل كده فى منتدى

عضو كان كاتبها بس مقلش مين اللى كتبها

بس جميلة اوى

هى حلوة فىها ابداع
لكن ان شاء الله المستقبل احلى
ادعوا بضمير
شكرااااااااااا يا قمر

بس مين الا عرف السيرة الذاتية بتاعتى
دى خصوصياتى

ولازم نطاطى لاننا فى بلد يموقراطى

شكرا على القصيدة اختنا الغالية نورسين

شكرا ليكو ياجماعة ويارب نتغير ان شاء الله