على اسم مصر

موضوع: على اسم مصر السبت أبريل 12, 2008 1:38 am

هيا برضه لصلاح جاهين بس لانها محتاجة توبيك خاص لانى بعشقها وكمان هيا طويلة وهنزلهلكو ع حلقات ياريت تستحملونى بس الاول هحكيلكو نبذة عنه

• اسمه الحقيقي محمد صلاح الدين بهجت أحمد حلمي

• ولد في 25 ديسمبر 1930 فى شارع جميل باشا بحي شبرا.

• والده المستشار بهجت حلمي الذي تدرج في السلك القضائي بدءًا من وكيل نيابة حتى عُين رئيساً لمحكمة استئناف المنصورة.

• التحق بكلية الحقوق بناء على رغبة والده، ودرس في ذات الوقت في كلية الفنون الجميلة دون علم والده لفترة قصيرة، ثم ترك الدراسة بأكملها وانغمس في العمل الصحفي.

• التحق بروزاليوسف وعمل سكرتير تحرير وظل يرسم بشكل سري إلى أن اكتشفه "أحمد بهاء الدين" -الرجل الثاني بالمجلة وقتها- فأفرد له صفحة كاملة أسبوعيا.

• كتب عددا كبيرا من الأغاني الوطنية وارتبط اسمه بثورة يوليو ومغنيها "عبد الحليم حافظ" وذاعت شهرته من خلال بعض الأغاني مثل "صورة" "السد العالي" وغيرهما.

• كتب السيناريو والحوار لعدة أفلام ‏مثل "خلّي بالك من زوزو"، "أميرة حبي أنا"، "شفيقة ومتولي" و"المتوحشة" كما شارك في إنتاج أفلام "أميرة حبي أنا"، "عودة الابن الضال"، وشارك بالتمثيل في عدة أفلام منها "شهيد الحب الإلهي" عام 62 و"لا وقت للحب" عام 63 و"المماليك" في عام 1965.

• توفي في 21 أبريل عام 1986.

على اسم مصر

النخل في العالي والنيل ماشي طوالي

معكوسة فيه الصـور .. مقلوبة وانا مالي

يا ولاد أنا ف حالي زي النقش في العواميد

زي الهلال اللي فوق مدنة بنوها عبيد

وزي باقي العبيد باجري على عيالي

باجري وخطوي وئيد من تقل أحمالي

محنيه قامتي .. وهامتي كأن فيها حديد

وعينيا رمل العريش فيها وملح رشيد

لكني بافتحها زي اللي اتولدت من جديد

على اسم مصر.

مصر .. التلات أحرف الساكنة اللي شاحنة ضجيج

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعي مقروطة

في مسامي مضغوطه مع دمي لها تعاريج

ترع وقنوات سقت من جسمي كل نسيج

وجميع خيوط النسيج على نبرة مربوطة

اسمعها مهموسة والا اسمعها مشخوطه

شبكة رادار قلبي جوه ضلوعي مضبوطة

على اسم مصر.

موضوع: رد: على اسم مصر السبت أبريل 12, 2008 2:09 am

جميلة اوى يانورسين

وبعدين مش لوحدك اللى بتحبى صلاح جاهين

موضوع: رد: على اسم مصر السبت أبريل 12, 2008 2:16 am

عارفة ياميدو بس خابفة لتزهقو منى من كتر مابكتب عنه
وميرسى جدا لمشاركتك

موضوع: رد: على اسم مصر السبت أبريل 12, 2008 7:57 pm

بجد جميلة جدا
بصراحة طول عمر صلاح جاهين
استاذ فى كل حاجة

ميرسى ياحنونة

موضوع: على اسم مصر الثلاثاء أبريل 15, 2008 1:09 am

وترن
من تاني نفس النبرة في وداني

ومؤشر الفرحة يتحرك في وجداني

وأغاني واحشاني باتذكرها ما لهاش عد

فيه شيء حصل أو بيحصل أوح يحصل جد

أو ربما الأمر حالة وجد واخداني

انا اللي ياما الهوى جابني ووداني

وكلام على لساني جاني لابد اقوله لحد

القمح ليه إسمه قمح اليوم وأمس وغد

ومصر يحرم عليها .. والجدال يشتد

على اسم مصر.

ولما زماني رماني عليل

نسيت كل شيء عن حبيبي الجميل

لكن هو أبداً

انا مانساهوش

نسيت مشيته وصوته كان شكله إيه

ورسمة شفايفه

ولمسة إيديه

نسيت نظراته

نسيت لون عينيه

وقوس الحواجب وسهم الرموش

لكن هو أبداً

انا ما انساهوش

نسيت إسمه وحكايته وعرفته فين

وعشنا سوى العمر

والا يومين

وكان م البشر

والا طير بجناحين

نسيت حتى كان له وجود أو مالوش

لكين هو أبداً

أنا ما انساهوش

قطعوا الأغاني وطارت نشرة الأخبار

دارت على كل دار في الكوكب الدوار

يا حاضرين اعلموا الغايبين بأنه في مصر

اتغير الاسم منذ الآن فأصبح .. مصر

ضحك التاريخ ضحكته المشهور بها واندار

ودخل مناقشة مع الجغرافيا عما صار

هل نعترف بالبيان اللي أذيع العصر

أم ننتظر مصر تطرد اسرائيل بالقسر

وساعتها تحصل بكل جدارة يوم النصر

على اسم مصر.

موضوع: على إسم مصر الأربعاء أبريل 16, 2008 2:59 am

على
اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر.

مصر النسيم في الليالي وبياعين الفل

ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا في البيت

فيه القمر مصطفى كامل حبيب الكل

المصري باشا بشواربه اللي ما عرفوا الذل

ومصر فوق في الفراندة واسمها جولييت

ولما جيت بعد روميو بربع قرن بكيت

ومسحت دموعي في كمي ومن ساعتها وعيت

على اسم مصر.

أم ننتظر مصر تطرد اسرائيل بالقسر

وساعتها تحصل بكل جدارة يوم النصر

على اسم مصر.

يسمع منك ربنا

اكيد نورسين لازم يزيد احترامك فى المنتدى موضوعات جميلة
وكمان بتختارى رموز رائدة للحديث عنها
شكرا ليكى ع موضوعاتك
شكر خاص ع الموضوع صلاح جاهين

ميرسى ياأي ياقمرة ع مشاركتك

وميرسى ياأحمد جدا ع كلامك وردودك ميرسى جدا لزوقك

موضوع: على إسم مصر السبت أبريل 19, 2008 12:21 am

على
اسم مصر.

مصر السما الفزدقي وعصافير معدية

والقلة مملية ع الشباك .. مندية

والجد قاعد مربع يقرا في الجرنال

الكاتب المصري ذاته مندمج في مقال

ومصر قدامه اكتر كلمة مقرية

قريتها من قبل ما اكتب اسمي بإيديا

ورسمتها في الخيال على أبدع الأشكال

ونزلت أيام صبايا طفت كل مجال

زي المنادي وفؤادي يرتجف بجلال

على اسم مصر.

رحـيـلاً رحـيـلاً بغيـر هـوادة

رحـيلاً فإن الـرحـيل سعـادة

عبادة

إرادة

سيادة

ولادة

رحـيـلا .. إلى أين لـيس يـهـم

ولـيس يـهـم بأي وسيـلة ..

أجيـراً بلقمـتـه في البـواخـر ..

عـلى واحـد من جيـاد القبيلة ..

على مقعـد في ذرى الجـو فـاخـر

وتمـلأ الكـأس بنت جمـيلة ..

على قدمي .. أو بفكري .. أهاجر

أبادر

أغادر

أخاطر

أسافر

ولـكـن إلى أيـن .. لـيس يـهـم

إلى حيث لا تعبـر الأفـق شمس

إلى القـطب .. أو حلقة الاستواء ..

إلى حـيث يـسمـع لـلجـن همس

إلى بـاطـن الأرض أو في الـفضـاء

إلى مـرفـأ الغـد .. أو أرض أمس

أرى كل شيء ومن أين جاء

وافعل ما قاله القدماء

من الفقراء

أو الحكماء

أو الأمراء

أو الأشقياء أو البلهاء فليس يهم

لقد قيل وهو الكلام المهم

اللي يعيش ياما يشوف

واللي يمشي يشوف اكتر

شفت الجبرتي بحرافيش الحسين وبولاق

بان البلد ماشي زي النمس في الأسواق

بالفلاحين ع المداخل من بعيد وقريب

بالأرنؤوط بالشراكسة بكل صنف عجيب

مترصصين سور رهيب مزراق في ريح مزراق

كأنهم لا بشـر ولا خلقـة الخـلاق

ومصر فلاحة تزرق بين رقيب ورقيب

من غير أبو الهول ما ينهض ناهضة شايله حليب

والصبح بدري الجبرتي ينام وقلمه يسيب

على اسم مصر.

موضوع: على إسم مصر الأربعاء أبريل 23, 2008 3:01 am

على اسم مصر.

مصر اللي عمر الجبرتي لم عرف لها عمر

وطلع لقاها مكان مليان عوام وزعر

جعيدية غوغاء يجيبوا تملي وجع الراس

وخليط أفارقه هنادوة روم ملل أجناس

والترك في القلعة والمماليك خدودهم حمر

كان عمرها ستلاف سنة .. كلها سنين خضر

بس الزمان يختلف زي اختلاف الناس

ناس تبني مجد وحضارة وناس بلا احساس

وناس تنام لما يزحف موكب الأحداث

على اسم مصر.

أنا اللي اسمي حتحـور .. أنا بنت رع

مثـال الأمـومـة ورمـز الحـنـان

تفـيض وتمـلا الـتـرع

وتسـقـي البـشـر كلهـم والغـيـطان

أنـا ربـة الحـب حتـحـور أنـا

أنـا السيـدة المـنـجدة المـغـرميـن

وكـم مـن محـب ف هـواه انـضـنى

دعـاني وطيـبـت خـاطـره الحـزيـن

أنـا طـيبـة انمـا طـبـعي صـعـب

وديعـه .. ولـو ثـرت بـطشـي مـهـول

ما اشـوفش اللي قدامي لو ألف شعب

أدوسـهـم وتجـري دمـاهـم سيـول

ويـوم رع ما فـات بسنـاه في السـما

وكل العيـون خايفـة تنـظر اليـه

وجـالـه القمـر خلقتـه معتـمة

وعـدى قصـاده .. وضـلم عـليه

يا ويـل الـلي فتـح في ابـويا العـظيم

يا ويل من تطاول يا ويل من ضحك

يا ويـلك يا مصـر مصيرك الـيم

موضوع: على إسم مصر الجمعة أبريل 25, 2008 12:57 am

على إسم مصر

أنا اللي اسمي حتحور انا ح امسحك

يحـاول يهـديني رع ما اسمـعـوش

وادمـر واطـيـح في البلاد والعبـاد

أنـا الـطيبـه .. كنت زي الوحـوش

سفـكـت دماء البـنـات والـولاد

دبـحت المحبـين في عـز القبـل

هـدمت المعابد على المنشدين

قلبت على النحـاتين الجبل

حرقت الغيـطان هم والفلاحين

لحد ما رع نـادى ع الآلهة

وقال صـبوا في النهر كل النبيذ

وشفت الميـاه حمرا ومزهزهة

وظنيتها دم الضحايا الـلذيذ

شربت انتقامـاً شربـت شربـت

وأنا بالـعن المفتـري والغبـي

وحبـة بحبـة عن الوعـي غبت

ونمت على النيل في ضي أبي

وقمت .. بكيت من فؤاد أم ثكلى

ونهنهت فوق صدر مصر العريض

على العالم المبدورين جنبي قتـلى

وكان دمعي ينصب في النيـل يفيض

واقول ليه يا مصـر ولادك كـده

يا إمـا المذله يا يتـجبـروا

يا خوفـي يا فـرحة قـلوب الـعدا

ويا نـدمـي لو ما يتغيـروا

ومن يـومها والنيـل في نفس المعاد

يفيض كل عام قبل فصل الخـريف

بلون حمرة الـدم يملا البلاد

ويملا النسـأيـم بعـطر مخـيف

بعطري أنا الـلي اسمي حتحور أنـا

وعـطري مخـيف وحـنون وطـري

يفـرح بس مـرة في كـل سنة

ويهمس يا مصر اذكـري .. واحـذري

نهايته يا مصر اللي كانت أصبحت وخلاص

تمثال بديع وانفه في الطين غاص

وناس من البدو شدوا عليه حبال الخيش

والقرص رع العظيم بقى صاج خبيز للعيش

وساق محارب قديم مبتورة ف أبو قرقاص

ما تعرف اللي بترها سيف والا رصاص

والا الخراب اللي صاب عقل البلد بالطيش

قال ابن خلدون أمم متفسخة تعيش ليش

وحصان صهل صحى جميع الجيش

على اسم مصر.

موضوع: رد: على اسم مصر الجمعة أبريل 25, 2008 2:15 am

واقول ليه يا مصـر ولادك كـده

يا إمـا المذله يا يتـجبـروا

يا خوفـي يا فـرحة قـلوب الـعدا

ويا نـدمـي لو ما يتغيـروا

شكرا نورسين صلاح جاهين كلامه يواكب كل العصور

موضوع: رد: على اسم مصر الجمعة أبريل 25, 2008 6:40 pm

فعلا ياميدو لما بقراله بحس انه موجود وعارف ايه اللى بنمر بيه

ميرسى ياميدو لمرورك جدا