تيجوا نلعب سوا لعبة عروستى ؟
___________________________
عروستى ..؟
اسم بلد
مليان نكد
مافيهوش ولد
يقوم يقول
شدى حيلك يا بلد
عروستى .. ؟
اسم وطن
مابقاش وطن
مافيهوش أمان
و لا سكن
و ده رغم إنه
كان ياما كان
كان زمان
حضن لحضارة
و كان منارة
لكن خسارة
بأبكى بمرارة
و أنا بأقول
ده كله كان
أما الآن
؟؟؟؟!!!!!
علامات استفهام
و تعجب كمان
عروستى ..؟
بلادى .. بلادى
دى بلادى ما عادتش بلادى
لا الدلتا دلتا
و لا الوادى وادى
و حال يشمت الأعادى
و لا حد فرحان و لا حد راضى
عروستى .. ؟
لما تلاقى حب الوطن صبح أغانى
لما تلاقى ...
لأ ما تلاقيش
لأى حاجة بنعملها أى معانى
و كل يوم زى التانى
و كل واحد كل اللى همه
لقمة عيش تسد فمه
و حتى العيش أصبح مافيش
لما تلاقى من غير خشا
اللى سرق و اللى ارتشى
و اللى فقد كل الأمل
و عاش زى خيال مآته
يا دوب بس بيحتمل
لحد ما ييجى يوم مماته
لما تلاقى ناس بتكسب م الهوا
و لا يكتفوش
و لا يتكسفوش
دول ناس فاشوش
و للأسف فى ايديهم المية و الهوا
و الأكل .. و العيش .. و الدوا
و سابولنا بس الهوهوة
عروستى .. ؟
الجمعة أبريل 04, 2008 1:41 am
